Edukada
     ang tawag kay Melissa
Tinitingala
     saan man magpunta
Pinagtapusan,
     kilalang pamantasan
Kaya naman
     lubos na iginagalang.

Ngunit minsan,
      akin siyang nakita
Natalisod
      sa gamit ng iba
Ako'y nagulat -
      bigla siyang nagmura!
Kahit may-ari'y
      humingi ng dispensa.

Buti pa pala
      si Aling Milagros
Elementarya
      lamang ang natapos
Magulang kasi
      sa pera ay kapos
Ngunit ugali
      sa bait ay puspos:

Tumutulong
      sa nangangailangan
Mapagpasensiya
      sa may pagkukulang
Laging magalang
      sa pagsasalita

Puso'y marunong
      maawa't umunawa.

Isang mataas
      ang pinagtapusan
Isang mababa
      ang pinag-aralan
Ngunit sino
      kaya sa kanila
Dapat ituring
      tunay na edukada?